وش هالمهزله بالنظام؟

[الفيس السموح]

ياعميدتنا شوفي لك صرفه مع هالمهزله
عطيتونا بطاقات وقسمتو الأقسام بين بوابات (حلو خفت الزحمه) لكن المصيبه باللي حاصل
وهو عند بوابة الإنجليزي حيث نطلع المحاضرة السادسة (الساعه1 )
وبعد ربع ساعه نتفاجأ بالبواب يسكر الباب ويطردنا هو والهيئه للبوابه الرئيسية! (لا ووالله من زين الإسلوب ) ترانا بنات ناس مو غنم (حتى الغنم يحترم أكثر منا بهالكليه)
والبواب يقول أنا مأمور أسكر الباب 1وربع (طب ليه ؟ فيه أقسام لازال عندهم سابعه بعده ماخلص الدوام والباب مايصك لين تطلع آخر بنت وهذي مسؤليه)
والأدهى أهالينا حنا واعدناهم عند بواباتنا ليه المهزلة والحوسه حتى الجوالات ممنوعه عشان نعلمهم (بتغير المواقع الحاصل) ياااااااانظام جامعه ماخبرنا الجوال ممنوع بالجامعه!!!
والمشكله مره نطلع مع نقل ومره مع اخواننا ومره آبائنا يعني مو كل مره يحددون مواقعنا صح
(الدعوا شختك بختك .. حزر فزر بنتك مع أي بوابه ؟؟؟) لازم ياخذون جوله حول بوابات الكليه
والضعيفين مايقدرون ياقفون من المرور وحنا حاجريننا مانتحرك من الهيئه(الله يجزاهم خير ع الجهود المبذوله هم والبوابين)!!!صدق نظام مميز ..
اليوم اضطريت أمشي للبيت والسبه النقل رجع يقول بوابتكم مسكره..وهذا السبب اللي خلان أنزل موضوعي أول مادخلت من القهر .. لي متى هالمهزله ؟ بس أنظمة بالمظاهر والهرج
والخافي أعظم مير ماعندك أحد يسمع .. بس سهام الليل ماتخطئ ودعوة المظلوم مستجابه
من عرفنا هالكليه أقصد هالمقبرة وحنا مظلومين

شوووووفو لنا صرفه مع هالبوابات وترى ماحس بالمصيبة إلا اللي جربه
ردوا يابنات تكلموا هالموقف صاير يوميا لنا كلنا يسحتوننا من باب لباب ..والحق ينقال

[Tmimiyah]

جبتيها على الجرررررررررررررررررررررررررح


:( انا من اكثر الناس الي معترضين على سالفة ممنوع جوال !!!!!

تخيلي مره نساني النقل :confused: وانطقيييييييييت وتأخرت :mad: رحمني ربي ان امي دقت تسأل عني لما تأخرت وتذكرني النقل :mad: المفرووض معاي جوال ادق اسأل


:o والهيئه الله يصلحهم :eek: مضايقينا بسالفة لاتتحركين من على الباب

:mad: بنتضر النقل طيب يقولي ادخلي وبيصوت لك بالمايك :eek: ووش يصوت ليه ماانتضره برا طالما اني لابسه عبايتي ومحتشمه وجالسه على الدرج وين المشكله !!

:confused: حتى هالدرج مسوين لنا زحمه خيييييييير يعني يضل وااقفه !! مقدر تعبت

صراحتن كليتنا كنهم يقولون لنا تقذلفو بسرعه لبيوتكم

:( مايراعون ان عندنا ضروف نتأخر ونطفش ونفطس بالحر يعني المفروض يكونون متعاونين اكثرر

:( معاناة معاناة


وطبيعة قسمي غالبا نخلص المحاضرات بدري وننطق بالساحه بالحرررررررر :( اعتقولنا لله ياناس وخلونا نطلع لبيوتنا ابررك لناااااااااااااا مو حاجرينا

[*بنوته*]

افففففففففففففففففف بس منهم

بتعب وانا اقول اففففف


همهم يحطون نشاط وخرابيط مانبيه حطو محاظراتنا وشيلو السابعه...


منقهره مادري ايش اقول



ولي رجعه

[dark girl]

والله انك صادقة كنت اليوم ابي اكتب عن هالشيء صراحة منتهى الحوسة
الوحدة المسكينة تطلع مصدعة من المحاضرات بهالظهرية علشان توقف برا تنتضر اهلها
وتبدأ معها معاناة ثانية اسمحوا بالجوالات وفكونا لو كانت الدراسة يوم والا يومين بالاسبوع كان هانت بس المشكلة إنها يومياً كل يوم نفس المعاناة تتكرر وبعد اشوى إنهم ما نزلوا إلى الآن قرار إننا نداوم الخميس والجمعة لان هالكلية شروطها تعجيزية تبي الناس يكرهون الدراسة والعلم أصلاً من قال إننا نحبها .......:mad:
مثل ما تفتشون يومياً عالبطاقات فتشوا على جوالات الكاميرا واسمحوا بالجوالات العادية حرام عليكم اليوم اقول للي عند الباب الله يعافيك عطين جوالك ابي اكلم محد جاء يآخذني وتقول ممنوع إن الطالبة تكلم طيب وش تسوي الطالبة المسكينة تسكرت كل الأبواب بوجوهنا :eek:
انتم ياللي منعتم الجوالات حاولوا يوم من الايام تجون بدون جوالات شوفوا وش يصير عليكم ..:confused:
خلاص الدنيا تطورت ولا عاد ينفع الا الجوالات بدل هالكرف من بوابة لبوابة

[الفيس السموح]

ياحبي لكم والله .. عاد نشوف إذا فيهم خير يشوفون لنا صرفه (دايم ننفخ بقربه مقطوعه)
وبعشيكم إذا عدلوا مهزلتهم ..
همهم بس المظاهر وهرج الجرايد !! ماااااااااااااانبي شي بس ريحونا وحسسونا اننا بكليه مثل الخلق
مو نجي نتعذب ونرجع .. ووين الإرشاد اللي نسمع به ؟؟!
حتى لو شفناهم مع اني ماأظن شكاوينا كلام بورق ..لامن شاف ولا من دري
الله لنا بس

[الغيوورة]

أتمنى إلغاء سالفة بوابة الانجليزي لأن المشوار طويل من القسم للبوابة إلى النقل
ثاني شي الغسالة بدت تشتكي من كثرة الغسيل يومياً مرة تنورة ومرة عباية بسبب المشاوير والغبار والنقل الله يسلمه يوقف عند بوابة العربي..
لا عن جد بوابة الانجليزي متعبة للغاية

[queen]

الرجاء من العميده الله يجزاها خير حل المشكله والله تعبنا وطفشنا وملينا

[ِ~ حنين الذكريات ~ِ]

وبعد ربع ساعه نتفاجأ بالبواب يسكر الباب ويطردنا هو والهيئه للبوابه الرئيسية!

حصلي نفس الموقف تأخرت أنا بالكليه بيوم من الايام >>> وعطيت أخوي

خبر أني باكون واقفه عند بوابة الانجليزي (( زي ماحددوا لنا )) ويوم

رحت رجعن البواب لين البوابه الرئيسيه (( حكم القوي )) المهم صار

أخوي هناك عند البوابه واقف له ربع ساعه ينتظرن عند بوابة الانجليزي

وأنا مدريت(( وحصلت خنااااقه محترمه ))>>> عشاني عطلته عن

عمله ...

ياعميدتنا أنتي حددتي لنا بوابه خلااااص ياليت يتم التقيد بها من قبل

الحراس وتظل مفتوووحه موب تسكر من قبلهم ويقال لنا روحوا

للبوابه الرئيسيه وبالأخيييير نحصل الخنــــاق من أهالينا ....


أتمنى إلغاء سالفة بوابة الانجليزي لأن المشوار طويل من القسم للبوابة إلى النقل

الرجـــاء من العميده إلغاء بوابة الانجليزي مو بس أن المشوار طويل نحن

طالبات قسم الاقتصاد معروفين (( بالتشقيل>>> تحميل هالاكيـــاس )) والله

تعبنــــــا ...

وش نبي نسوي بعدين بإختبارات العملي الله يعين بس ...

[¨°o.Oمتهـ اتخرجـO.o°¨]

يعني انتم مأملين بهالكليه قصدي الجامعه خير!!!

والي يزيد الطين بله التخصيص ليييييييييش؟؟؟؟

النقل عند بوابه الانقليزي واطلع من بوابه الرياضيات واقطع مشوار بين الزحمه والسيارات

طيب اييييييييييش وش بيصير اذا طلعت مناك؟؟؟؟؟

والله انه من جرف لدحديره

ومااحد حاس بنا ومعاناتنا

الله يعجل بساعه التخرج بس

[رومنسيه منسيه]

الله يعينكم

قسم بالله إن هالانظمه زينه بس وين الايطبق النظااام بإتقااان ,و شينه بالاستهتار من البعض بعدم التنفيذ ....

[الفيس السموح]

صادقه ياملاك .. والله ماألوم أهلي إذا هاوشو .. حتى هم الضرر لاحقهم من هاللي يسمونه أنظمة!!!!!!!!!!!!!!!!!!!!!!!!!!!!!!!!!!!!
(أقول تنظموا ثم حطوا أنظمة )

[قــ أطيب ــلب]

بصراحه وش اقول وش اخلي..
البوابات كلها كووم والجداول كووم ثاني
انواع الخربطه بالمحاظرات صراحه .. يعني تجيك الدكتوره على كيفها تعطينا محاظره ماده والمشكله ان هالماده بيوم ثاني يعني تبديل من غير لايقولون لنا مسبقا واللي ينظلمون اكثر شي والله الباقيات مايدرون اننا اخذنا محاظرة هالماده قبل ويحسب لها غياب طبعا ... وعلى هالحاله .!!!!!
مثل اليوم محاظرة قرامر اولى .. طبعا الباكستانيه راحت ماتدرسنا وتجيك سعوديه .. والمشكلها انها تدرسنا مفردات وقرامر .. وزود الطين بله يوم عطتنا محاظرة القرامر وخلصت قالت يالله عشر دقايق استراحه وبناخذ مفردات !!!!!
مو معقووووووووووووووله اللي تسويه طبعا من غير سابق علم لنا وبتجلسنا الى 2 بس قامو البنات يقولون لها اهلينا بيجون وحده وزي كذا وطلعتنا مابغت!!!
ولكم تحيااتي

[مجرد إنسان]

عـــــزيزاتي......

بخـــــــــــش معكم عرض,,,,,,,,,

أنا ما ألومكم ,,,في عدم التقييد بالنظام و الإدعاء بالتنظيم,,,,

لأنــــــــي مجربة مديرتنا أيااااااام الثانوي كانت قبل كذا تقـــول الطلعة1:15و الفراش يفتحه1:00....

ثُــــــم عبال ما نطلع من الحصة السابعه إلا هـــلمناوبات يتــــحاشقننا...

قسم كـــــــانت بالزت تطلعنــــا و ننطق بالشارع من وحدة إلى وحدة و ربع,,,,


أمحـــــــــــق تــــــــــــخــــــلــــــــف,,,,


الـــــــمــــــهم الـــمراد,,,

المــــــــوضــــوع حـــــــــلو ليش ما حطيتوا على الخط الساخن و بعين{ن } قوية...


عـــــــــشــــــان مانخرب نظـــــــام المنتدى ونصير حـــوسة:D:D

[أبكاني ذنبي]

الله مير إنه يسلمكـ يا الغلا على ها المبادره الرائعه ...
بس أقولك من ذا الحين ما راح أحد يعطيك وجه ...لأنه لازم تدخلين الموقع اللي منزلته العميده ومعلقته في مبنى قسم الإنجليزي ..يمكن يمكن يمكن ترد عليك!!!
وبا النسبه للمعاناة اللي أنتي تقولينه ...وش تقولين عن بنات القرى اللي والله ماياصلون بيوتهم إلا الساعه خمس<< اللي يشوف مصيبته تهون عليه مصيبة غيره << الله يعينهم
وأنا عندي إقتراح <<< قولي يا ام الإقتراحات>> المهم ...وش رايكم نرفع للعميده ورقه ونكتب فيها ترجع لنا نظامنا الاول وهو إنه ندخل المحاضره الاولى الساعه سبع و ربع ويكون مافيه خمس دقايق<< كأنا مستفيدين من ها الخمس دقايق ياخذونها علينا ويقولون خمس دقايق لكم والله ماعندكم سالفه>> ونطلع من السابعه الساعه وحده وربع و البوابات تفتح الساعه 12ونص وطبعاً السادسه تكون مخلصه الساعه 12وثلث .... وش رايكم يااااااحلوين ....
شكله با الحلاااااااااااااااام يرجعونه لنا .....بس والله لو كل قسم يطلع ورقه بها الإقتراح اللي قلته ليغيرونه إن شااااء الله ..بس أنتم اتحدوا وشوفو النتيجه والعميده بإذن الله ماراح تقصر...
وتسلمووون ماعليش أخذت من وقتكم...با التوفيق للجميع

[الفيس السموح]

...لأنه لازم تدخلين الموقع اللي منزلته العميده ومعلقته في مبنى قسم الإنجليزي ..يمكن يمكن يمكن ترد عليك!!!

معليش أختي عاشقة الشهادة وش ذا الموقع اللي تقوليت توي أدري عنه ووين معلق:confused:
مع إني من ذا القسم ماعمري شفت شي (الظاهر مثل الجدول اللي يتغير مادرينا عنه)

وبالنسبة لإقتراحك ناقشناه مع المسؤلة عنا بمحاضرة الإرشاد وماقصرت معنا بس من بيسمع لنا:mad: لإن إقتراحاتنا لنا ماشفنا شي:D

[طبعي الوفاء]

فــــــــــــــــــعلاَ معاناة , , الله يفرجه من عنده

الوالد الله يحفظه ويخليه حـــــــــــــــــــــــــــــلف علي إني أخذ جوال معي بعد ماكان ينتظر
أكثر من نصف ساعة تقل سواق :confused:
من حوسة أبواب أو جداول !! وش ذمبه يعني ؟
والحمـــــــــدلله مارتحت إلا يوم أخذت جوال :p لافيه كاميرا ولابلوتوث ولاشيء يعني
للفايدة بس << بكرا يفتشون:rolleyes: .. وحتى مايسوى لو أخذوه .. أشري راحتي شرااااء
واللي يبي الشر بجوالات وإلا غيره يسويه لو كل شيء ممنوع ! الله يكفينا الشر .

[صميم القلوب]

الله يعينكم
يفرجها الله ان شاء الله

[وكيلة الأقسام الأدبية]

طالبتي الغالية..
اغلاق البوابة كان سوء تصرف وعدم انظباط بالعمل من حارس بوابة اللغة الإنجليزية وقد تم تنبيهه مرات عديدة..وسينبه مرة أخرى..

تمنياتنا لكن يالتوفيق..

[ِ~ حنين الذكريات ~ِ]

طالبتي الغالية..
اغلاق البوابة كان سوء تصرف وعدم انظباط بالعمل من حارس بوابة اللغة الإنجليزية وقد تم تنبيهه مرات عديدة..وسينبه مرة أخرى..

تمنياتنا لكن يالتوفيق..

وفقك الله عميدتي الغاليه.. وشكر الله لكِ طيب تعاونك


ووتفاعلك مع أخوتك الطالبات ...وهذا ليس بغريب عليك ...


جزاك الله الفردوس الاعلى الجنان ...